LAOAG CITY – Inbatad ni Bombo International News Corrrespondent Denmark Suede ken dati a piloto ditoy Pilipinas a masapol a maaddaan ti pagilian ti independent body nga agimbestigar kadagiti mapaspasamak a panagpukaw dagiti Cessna plane.
Daytoy ket kalpasan a saan pay a naibirokan ti Cessna plane a nagpukaw iti probinsya ti Isabele ken iti Albay.
Segun ken ni Suede, ditoy Pilipinas ket ti met lang Civil Aviation Authority of the Philippines ti mangimbestigar kadagiti insidente dagiti eroplano ken saan a kas iti Australia nga addaan ti bukod nga independent body nga agim-imbestigar iti nagduduma nga aksidente.
Kuna na a babaen iti daytoy ket maikkat ti posibilidad nga adda ti pannakailemmeng dagiti pudno nga agbalin a resulta ti imbestigasyon ken mapagsungbat dagiti maduktalan nga addaan ti nagkurangan na.
Innayun na a masapol nga adda ti maipasa a linteg seknan iti pannakadutok ti independent body nga agimbestigar kadagiti nagduduma nga aksidente iti tangatang tapno maliklikan ti pannakaulit dagiti nasao a pasamak.
Immuna iti daytoy, inpakaammo ni Suede nga ado a factor ti mabalin a mangitunda iti panagswek ti eroplano kas iti sasaaden ti panawen, manufacturing defect ti eroplano, air traffic control ken dadduma pay.
Maipalagip a naudi a lawas ti Enero ita a tawen idi nagpukaw ti Cessna plane iti probinsya ti Isabela idinto nga idi laeng kalman ti nagpukaw met laeng a Cessna plane iti Albay kalpasan a pimmanaw iti Bicol International Airport.
Agpapan ita ket agpada a mabirbirok dagiti dua nga aircraft pakairamanan dagiti naglugan a pasahero.
