LAOAG CITY – Nagyaman ni Pinoy Para Swimmer Ernie Gawilan iti nagbalin a suporta dagiti Pilipino iti Team Philippines para iti Parlympics 2024 nga agleppas ita nga aldaw, Setiembre 8.
Segun ken ni Gawilan, naiget ti naawat a suporta ti team manipud kadagiti sports fans ken dagiti opisial ti pagilian sipod pay idi agsagsaganada pay laeng agingga nga agleppasen ti nasao a laban.
Ni Gawilan ket maysa kadagiti miembro ti Philippine delegation a dimmanon iti Finals ti 400m freestyle ti swimming ngem napaay a makadanon iti medal finish.
Nagun-odna ti maikanem a puesto iti event kagiddan metten ti napintas a performance nga inpakitana iti Para games.
Kabayatanna, naammoan a ti Team Philippines a nakipaset iti Paris Para Games ket bukbuklen da Allain Ganapin ti Taekwondo, Angel Mae Otom ken Ernie Gawilan iti swimming, track and field athletes Jerrold Mangliwan ken Cendy Asusano ken archer Agustina Bantiloc.
