LAOAG CITY – Inadmitirna ti Department of Education (DepEd) iti krisis ti literacy ditoy pagilian kalpasan a naiparuk-at ti maysa nga assessment nga 87 a porsiento dagiti estudiante ti Grade 11 ket marigatan pay laeng nga awaten dagiti basbasaenda.
Basar iti Department of Education, ti nasao a bilang ti mangipaneknek ti nabayagen a learning gaps system ti edukasion ditoy pagilian ken saan laeng daytoy a problema ti senior high school.
Inbatad ni Department of Education Undersecretary for Learning Systems Carmela Oracion, a seryoso ti ahensia mainaig iti naiparuk-at a resulta iti Second Congressional Commission on Education (EDCOM 2).
Mainaig iti daytoy, nangisayangkat ti Department of Education ti summer remediation program para kadagiti estudiante ti senior high school a naikeddeng a malpas iti daytoy a lawas.
Agsagsagana ti nasao nga ahensia iti manarimaan a planoda a literacy assessment sakbay iti pormal a panagrugi ti klase tapno maammoan dagiti estudiante nga agkasapulan ti suporta ken tutoring.
Inpetteng pay ti Department of Education nga iramanda iti baro a three-term school calendar ti remediation ken enrichment activities tapno masiguradoda a masolbar ti learning gaps iti sibubukel nga school year.
