LAOAG CITY – Inadmitir ni Pinoy weightlifter John Ceniza a sumangsango daytoy iti dakkel a karit iti labanna iti Paris Olympics.
Inbatadna nga adu dagiti mangnamnama kenkuana a sarunnoenna ti takder ni Hidilyn Diaz nga isu ti nakagun-od ti umuna a balitok a medalya idi Tokyo Olympics.
Sumabak ni Ceniza ita nga aldaw ti Mierkoles iti oras ti alas-9 ti rabii para iti 61-kilogram events iti South Paris Arena.
Ti agtawen iti 26 a lifter manipud iti Cebu ket nakastrek iti Olympics kalpasan a nagun-odna ti maikalima a puesto ti International Weightlifting Federation (IWF) Olympic rankings.
Iti uneg ti maysa a bulan ket nag-training ni Ceniza idiay Metz, France ken Germany pakairamanan dagiti dua a dadduma pay a Pinay weightlifter nga isuda Elreen Ando ken Vanessa Sarno.
Makipaset ni Ando iti 59 kgs. event inton bigat, Agosto 8 iti oras ti alas-9 ti rabii idinto ni Sarno ket inton Agosto 10 iti oras ti ala-1 ti parbangon para iti 71 kg. event.
