LAOAG CITY – Nagballaag ti Philippine National Police (PNP) kadagiti residente iti ciudad ti Batac a nakauyus wenno awan ti badona kabayatan nga adda iti ruwar ti pagtaengan.
Segun iti Philippine National Police, naobserbaran da nga umad-ado dagiti makitkita da a residente a nakauyus kabayatan ti kaadda wenno panagtambay da iti ruwar.
Inpalagak ti Philippine National Police a no adda ti makita da a nakauyus kabayatan ti panagpartrolya da ket alaen da dagitoy ken ikabil da iti kwerpo ti pulisya tapno mabagbagaan da paylaeng.
Nupay kasta, no uliten to manen dagiti maseknan ti panagtambay da iti ruwar a nakauyus ket addan ton ti maipataw a multa kadakuada, ngem saan pay a masinunuo no mano ti pagmulta dagiti maseknan.
Inpakaammo ti Philippine National Police a nakikoordinar dan kadagiti amin nga opisyales ti barangay iti ciudad ti Batac mainaig iti daytoy a banag.
