LAOAG CITY -Naka-heightened alert ti Philippine National Police (PNP) mainaig iti manamnama a tignay-protesta kabayatan ti pannakaisayangkat ti hearing iti International Criminal Court (ICC) kontra ken ni dati a Presidente Rodrigo Duterte.
Segun ken ni Philippine National Police Cheif Jose Melencio Nartatez Jr., naikabil ti heightened readiness ti aminnga unit ti nailian a pulisya ken agdama a monmonitoren da dagiti possible a dakkel a panagtitipon tapno masigurado ti kinaurnus ti seguridad ti publiko.
Kuna na nga aniaman a grupo ti mangisayangkat ti panagtitipon ket nakabantay dagiti kameng ti pulisya tapno protehiran dagiti karbengan da ken pagtalinaeden ti kapia ken kinaurnus.
Mainaig iti daytoy, inbilin pay ti PNP chief kadagiti regional unit a mangdutuk ti Civil Disturbance Management (CDM) teams ken siguradwen a naka-standby dagiti medical emergency responder no bilang adda ti dakkel a panagtitipon.
Innayon na a maximum tolerance ti agpannuray iti nailian a pulisya isut gapuna a binilin na amin a miembro ti organisasyon nga agtalinaed a propesyonal ken liklikan ti aniaman a komprontasyon ken suruten ti linteg.
Kabayatanna, nagpanawagan ti PNP Chief kadagiti kritiko ken supporters ni Duterte nga agtalinaed a natanang ken saan a pagpannurayen ti emosyon a mabalin a mangitunda ti kinadamsak wenno pananglabsing iti linteg.
