LAOAG CITY – Nakasaganan ti Philippine National Police (PNP) para iti maisayangkat a Traslacion inton bigat no sadinno a manamnama ti minilyon a deboto nga agatendar para iti nasao a tinawen a relihioso nga aktibidad.
Inbatad ni Acting Philippine National Police Chief Lt. General Jose Melencio Nartatez Jr., naiyurnosen ti seguridad iti nasao a fiesta ken nakasaganadan a mangipatungpal ti real-time adjustment ken mannarimaan ti pannakikoordinarda kadagiti dadduma nga ahensia ti gobierno.
Kunana a nai-deploy-en ti umdas a bilang dagiti police personnel iti Quirino Grandstand pakairamanan iti Quiapo tapno masigurado ti kinatalged ti publiko kabayatan nga isaysayangkat ti aktibidad dagiti deboto.
Nakaplastar metten dagiti operatiba a nakasibilian ken intelligence units tapno lappedan dagiti insidente kas ti panagtatakaw, panangallilaw ken dadduma pay a klase ti krimen iti panawen ti pahalik.
Nangi-deploy pay ti ahensia dagiti police assistance desk tapno tumulong kadagiti deboto nga agatendar.
Kuna ni Manila Police District (MPD) Spokesperson Police Major Philipp Ines naka-full alert ti Manila Police District para iti Traslacion, agtultuloy a maipatungpal ti maximum tolerance iti kapulisan ken nagpalagip daytoy a ti pudno a deboto ket agtungtungpal iti pammilin ti simbaan ken dagiti otoridad.
