LAOAG CITY – Inbatad ni Police Inspector Joel Corales, ti deputy chief of police iti PNP idiay ili ti Pagudpud nga awan pay ti naaw-awat da a warrant of arrest kontra iti maysa a politiko iti nasao nga ili.
Nupay kasta, inadmitir na nga adda ti naipost iti facebook ti PNP-Pagudpud a kopya ti bench warrant kontra ken ni dati a Mayor Reynolan Sales.
Segun ken ni Corales, ti nasao a bench warrant ket naisyu idi Disyembre 28, 2018 ken pinirmaan ni Atty. Reynaldo Pitrus iti Sandiganbayan.
Innayon na nga apaman a nakita da ti nasao a bench warrant ket nagturong dagiti kakadwa na karaman ti hepe ti nasao nga ili iti balay ti dati a mayor ngem awan ti maseknan.
