LAOAG CITY – Nagpalagip ti liderato ti Philippine National Police (PNP) iti amin a kameng ti nailian a pulisya, karaman dagiti content creator ken aktibo nga agus-usar ti social media, a liklikan ti mairaman iti isyu iti pulitikal ken agtalinaed a napudno iti mandato da a mangipatungpal ti linteg ken pagtalinaeden ti kinaurnus ti pagilian.
Iti statement, inbatad ni Philippine National Police Chief General Jose Melencio Nartatez Jr. nga awan ti lugar ti pulitika iti nailian a pulisya ken saan a paset kadagiti riribok a pulitikal nga agdama a mapaspasamak iti pagilian.
Segun ken ni Nartatez, masapol a ti tutukan dagiti pulis ket ti panangipatungpal ti linteg ken iti panangipaay ti seguridad iti publiko imbes a makipaset kadagiti debate ken argumento iti social media.
Inpetteng ti PNP chief a nupay adda ti karbengan dagiti ordinaryo nga umili a mangirakurak ti opinyon da, sable ti sitwasyon dagiti pulos gapu ta animana ti pampubliko a rakurak da ket mabalin a maibilang a posisyon ti sibubukel nga organisasyon.
Gapu iti daytoy, ginutigot ni Nartatez ti amin a personnel da a mangipakita ti disiplina ken limitaran ti panagusar ti social media tapno maliklikan ti aniaman nga impresyon ti panangpabor iti amian a kampo ti pulitika.
Kagiddan iti daytoy, nagpanawagan met ti Philippine National Police iti publiko nga agbalin a naannad iti impormasyon a makitkita iti internet ken liklikan nga iwaras dagiti saan a beripikaado nga impormasyon.
