LAOAG CITY – Kalikagum ti Philippine National Police (PNP) a patawan ti lifetime ban iti panaggatang kadagiti armas iti asinoman nga aglabsing iti election gun ban.
Inbatad ni Philippine National Police Chief General Rommel Marbil nga ipakaammoda dagitoy kadagiti agpanpanday linteg dagiti aglabsing ti gun ban ti Commission on Elections (COMELEC).
Daytoy a gakat ket kalpasan iti napasamak a pammaltog kadagiti tallo nga indibidual gapu iti riri iti trapiko a napasamak idiay siudad ti Antipolo.
Maipalagip nga idi Enero 12 idi rinugian ti Philippine National Police ti pannakaipatungpal ti nationwide gun ban para iti May 12 Local and National election.
Gagem ti gun ban a masigurado ti kinakappia ken makissayan ti kinaranggas iti umas-asideg nga eleksion.
