LAOAG CITY – Inbatad ni Provincial Director Police Col. Christoper Abrahano a nireliboan na a dagus ti chief of police iti ili ti Paoay ken ti pulis a maipagarop a nangdangran ti maysa nga Army reservist a frontliner iti nasao nga ili.
Segun ken ni Abrahano, napan nagreklamo ti biktima iti Ilocos Norte Police Provincial Office idi kalman mainaig iti inaramid kenkuana ni Police Lt. Aldrin Sadian idi rabii ti martes.
Maladingitan ni Abrahano gapu ta idi laeng kalman a naamoan na ti napasamak iti mismo pay a biktima.
Inpakaammo na nga apaman a naamoan na ti napasamak ken naawat na ti reklamo ti Army Reservist ket rineliboan na a dagus iti pwesto ni Police Capt. Eddie Suyat, ti chief of police iti PNP-Paoay ken ni Sadian.
Kuna ti provincial director a basar iti palawag ni Suyat, idi laeng kalman na a naamoan ti napasamak gapu ta saan a napan ti complainant iti opisina na, ngem inkalintegan ni Abrahano a saan nga umdas ti rason ti chief of police gapu ta nasken nga ammo na a amin a mapaspasamak iti masakupan na a lugar.
Nagpangta pay ni Abrahano a possible a sumango ti agsusukot a kaso ni Sadian kas ti criminal ken administrative charges a mabalin nga agresulta ti pannakai-demote wenno maikkat iti serbisyo idinto a ni Suyat ket kaso administratibo partikular ti negligence of command responsibility.
Nagballaag pay ni Abrahano kadagiti kameng ti pulisya nga adda iti lugar a maipagarop a nakakita ti panangdangran ni Sadian iti Army Reservist a no mapaneknekan nga awan pulos inaramid da tapno malapdan ti kadwa da ket mabalin da met a mapilaan ti kaso administratibo.
Rumrumuar nga idi napasamak ti insidente ket ado dagiti nakaimatang a kakadwa ti army reservist ken dagiti pay pulis iti ili ti Paoay ken ciudad ti Batac a pada da nga agisaysayangkat ti checkpoint iti baro nga arko a nagbaetan iti dua a lugar.
Innayon nga iti agdama ket agtalinaed pay laeng da Suyat ken Sadian iti kampo tapno adda da latta a pagsaludsudan no adda ti kayat a maamoan dagiti imbestigador.
Immunan nga inbatad ni Abrahano a saan a maibaga ti army reservist no ania ti pudno a rason a dinangran ni Sadian ngem ti patien ti biktima ket ti maipagarop a saanna a panangrespeto kas ti panagtakder na koma idi dimteng ti nasao nga opisyal ti pulisya.
Nupay kasta, inpetteng ti provincial director a saan nga umdas a rason daytoy tapno dangran ni Sadian ti army reservist kangrunaan na ket volunteer frontliner ti biktima.
