LAOAG CITY – Inpakaammo ni Bombo International News Correspondent Rene Ballenas manipud idiay New Jersey, United States of America a posible a maitantan ti pannakairakurak ti resulta ti 2024 US Presidential Election.
Segun kenkuana, basar iti survey kadagiti pito a swing states pakairamanan ti Wisconsin, Pennsylvania, Nevada, Arizona, Georgia, North Carolina ken Michigan ket nagsinnublatda ti panagngato ti bilang dagiti butosda.
Inbatadna a basar iti nagbalin nga obserbasionna ket alisto laeng a nakabutos isuna gapu ta awan pay unay ti tattao idi napan nagbutos.
Kunana nga awan ti nariparna a naka-deploy a pulis wenno aniaman a security personnel.
Inlawlawagna nga awan dagiti naiwayat a tignay protesta kabayatan ti panagbubutos ngem idi panawen ti kampania ket adda dagiti tignay protesta a napasamak.
