LAOAG CITY – Mairekreklamo ti maysa a poultry farm iti Barangay Nanguyudan iti ili ti Paoay kalpasan a dumanon pay iti sabali nga ili ti nabangsit nga angotna.
Segun ken ni Barangay Chairman Joseph Ramos, ti Barangay Nanguyudan iti ili ti Paoay, namunganay ti reklamo kalpasan nga adda ti nag-post iti social media manipud iti Barangay San Pedro iti ili ti San Nicolas maipanggep iti nabangsit nga angot a maipagarup nga aggapu iti nasao a poultry farm.
Inbatadna nga insigida nga inpakaammona daytoy a banag iti akinkukua ti poultry farm a ni Mr. Dennis Ang babaen iti text message gapu ta saanna pay a personal a nakasarita isuna gapu ta makumikom ti negosiona a tabako.
Inlawlawagna nga idi laeng napalabas a lawas ket adu manen dagiti agrekreklamo a residente gapu iti kapada met laeng a reklamo.
Gapu iti daytoy, kunana a personal a nagturong mismo iti poultry farm ket ditoy a naimatanganna ti manarimaan a panagdalus ken panagakop dagiti caretaker ti poultry farm kadagiti rugit dagiti manok a nangitunda ti nabangsit nga angot.
Malaksid iti daytoy, mairekreklamo pay ti kinaadu ti ngilaw a mapmapan kadagiti pagtaengan iti nasao a barangay no sadinno a maitudtudo a paggapgapoan dagiti ngilaw ket ti poultry farm.
Inpasingked ni Kapitan Ramos a no bilang saan a masolbar ti akinkukua ti poultry farm ti arungaing dagiti residente ket isuna mismo ti mangidaulo iti pannakaserra iti daytoy.
Naammoan a nabayagen a mairekreklamo ti nasao a poultry farm iti baet dagiti reklamo dagiti umili.
