LAOAG CITY – Mangipasdek ti Department of Public Works and Highways ti diversion canal iti Quiaoit River iti siudad ti Batac tapno maliklikan ti nalawa a layus.
Daytoy ket kalpasan ti napasaran a panaglayus ken panaglippias ti Quiaoit River gapu iti iduduprak ti Bagyo Kiyapo iti kallabes.
Segun ken ni Department of Public Works and Highways Sec. Vince Dizon, adda ti maaramid a dua a diversion channel tapno ti volume ti Quiaoit River nga aggapu kadagiti kabanbantayan nga agturong iti siudad ti Batac ken iti ili ti Paoay ket mabaliwan ti pagturongan ti danum ken mapagbalin daytoy kas catch basin.
Inbatadna a saan nga insigida a naipatungpal ti proyekto a naaramid pay laeng ti master plan-na idi 2018 gapu ta in-inot ti pannakaiparuk-at ti pundo daytoy.
Inlawlawagna nga ikagumaan ti Department of Public Works and Highways a makabirok ti pundo para iti naan-anay a pannakaipatungpal ti proyekto inton 2027.
Kunana nga adda ti pammilin kenkuana ni Presidente Ferdinand Marcos Jr. a masapul nga agbalin a regular ti pannakaiwayat ti dredging.
Mainaig iti daytoy, inpakaammo ni Vice Mayor Albert Chua iti siudad ti Batac a mangrugi ti panagkutkut iti kanal ili ti Paoay agingga a makadanon iti siudad ti Batac.
Inpasingked ni Vice Mayor Chua nga inpanamnama ni Sec. Dizon a malpas daytoy a proyekto sakbay ti panawen ti panagtutudo inton sumaruno a tawen.
Innayonna a ti maaramid a diversion canal ket addaan ti kaakaba nga 6 agingga 8 a metro idinto nga addaan ti kauneg nga 4 agingga 6 a metro no sadinno a mabalin pay a mapagbalin daytoy nga eco-tourism park.
