LAOAG CITY – Ad-adalenen ni Presidente Ferdinand Marcos Jr. ti naipasa a legislated P200 wage hike iti Kamara ken no ania ti agbalin nga epekto daytoy iti ekonomia.
Inbatad ni Palace Press Officer Atty. Claire Castro, alaen ti Presidente ti opinyon ti wage boards para iti pagsayaatan dagiti mangmangged a Pilipino.
Malaksid iti daytoy, kunanana a kitkitaenda ti amin nga aspeto dagiti stakeholders tapno agbalin a balanse dagiti mangmangged ken dagiti pribado a sektor.
Inlawlawagna nga adayo pay ti pagdalananna ti legislated wage hike gapu ta maiyuli pay daytoy iti Senado para iti deliberasion.
Inpettengna a nalawag ti gagem ti Presidente a maipaay no ania ti rebbeng ken ad-adda a pagsayaatan para iti amin a mangmangged a Pilipino.
Maipalagip a sumagmamano nga aldaw sakbay a naipasa iti Kamara ti legislated wage hike ket kinataripnong ni Presidente Marcos Jr. dagiti lider kadagiti mangmangged iti Malacañang.
Saan met a nadakamat ni Castro no daytoy ti makaigapu no apay a nakapasa iti Kamara ti legislated P200 wage hike.
