LAOAG CITY – Saan a madanagan ni Presidente Ferdinand Marcos Jr. iti panagbaba ti approval ratings-na.
Inbatad ni Palace Press Officer Claire Castro a no ti rason ti panagbaba ti ratings ti Presidente ket gapu iti panangilungalongna ti imbestigasion iti anomalya ti flood control projects ket saanen daytoy a nagamak gapu ta ar-aramidenna laeng ti rumbeng.
Inlawlawagna a saanen nga iyur-uray pay ti Presidente no asino ti mangirugi ti imbestigasion ken uray naruay a pulitiko ken nangangato a tattao ti maapektaran.
Maipalagip a nakagun-od ti 48 percent a disapproval rating ni Marcos iti survey a naisayangkat ita a Disiembre a daytoy ket apagapaman a ngimmato a nairekord idi Setiembre.
Naammoan a ti approval ti performance-na ket ngimmato ti maysa a porsiento a nagbalin a 34 percent idinto nga 18 percent kadagiti respondents ket nagtalinaed nga undecided.
