LAOAG CITY – Plano nga ikiddaw ni Mr. Jonathan Bumanglag, Presidente ti Assosasyon dagiti Mannalon iti Brgy. Tangid ditoy ciudad ti Laoag a libre koma ti maipaay kadakuada nga abono.
Segun ken ni Bumanglag, babaen iti daytoy ket basbassit ti gastos da nga agtalon.
Kuna na a gapu iti nababa ti presyo ti irik ket saan da a maabrot dagiti gastos da iti panagtalon nangruna ket makita da a napintas ti apit ti irik iti daytoy a tawen.
Kuna na pay nga immabot iti 11 a tonelada dagiti irik ti naapit da iti maysa nga ektarya itay napan a tawen ken possible a masurukan daytoy.
Mangnamnama ni Bumanglag nga agtultuloy ti panangipaay ti gobyerno ti tulong kadagiti mannalon gapu ta saan na nga ammo no adda ti gundaway a malugi da wenno idadateng ti bagyo.
