LAOAG CITY – Inbatad ni Mr. Jonathan Bumanglag, ti presidente ti Barangay Agricultural and Fisheries Council nga awan ti ammo na ken saan nga isuna ti nagrecruit kadagiti nagtrabaho iti cash for work a saan a nasweldoan iti Barangay Tangid ditoy ciudad ti Laoag.
Sungbat na daytoy kalpasan a dinakamat ni Brgy. Kagawad Russel Anacleto ti nagan ni Bumanglag kadwa na ni Rodickson Pascual a maipagarop nga isuda ti nagisumitir ti nagan dagiti benepisyaryo ti cash for work.
Inpetteng ni Bumanglag a saanna nga ammo no siasinno ti napan nangsukat ti nagan dagiti immuna a nailista ken naisumitir ti nagan na a benepisyaryo iti nasao a program.
Inpalgak na a daytoy ti rason nga uray mapan alaen dagiti nagtrabaho ti sweldo da ket saan da a maala gapu ta awan ti nagan da iti listaan.
Immuna iti daytoy, inpeksa ni Mrs. Maricel Raymundo iti nadakamat a barangay ti sakit ti nakem na gapu iti saanna panagsweldo iti cash for work program no sadinno a maysa a lawas a nagdalus da iti barangay da manipod idi Setiembre 14 agingga iti Setiembre 17.
Kabayatanna, inlawlawag ni Barangay Chairman Amerlito Nicolas iti Brgy. Tangid ditoy ciudad a napan iti balayda ti agnagan ti Carlos nga agtrabtrabaho iti PENRO ditoy probinsya ken inpakita na ti listaan dagiti benepisyaryo ti cash for work.
Inbatad na nga iti listaan ket nakita na nga adda pay dagiti agkakabbalay ken adda ti maysa nga inhinyero.
Gapu iti daytoy, kiniddaw ti kapitan a no mabalin ket masukatan dagiti dadduma kangrunaan na dagiti agkakabbalay tapno sapasap a mabenepisyaran dagiti kabarangayan na a rebbeng na nga agbalin a benepisyaryo ti nasao a programa.
Kuna na nga immanugot met ti agnagan ti Carlos isut gapuna nga inpagarop da a nabaliwan ti listaan ken awan ti problema kadagiti siyam a kabarangayan da a naisukat.
Innayon na a no naamoan da a saan a nabaliwan ti listaan ket saanda koma met pinagtrabaho dagiti siyam a kabarangayan da.
Mainaig iti daytoy, dinayaw ti kapitan ti kinapudno ti maysa nga inhinyero a naikkan ti sweldo idinto a saan a nagtrabaho gapu ta inbilin na iti ina na a saanna a garawen ti kwarta ken maited daytoy iti rebbeng na a makaawat.
