LAOAG CITY – Naiget ti isaysayangkat a kampaniya dagiti dua a Presidential candidate ti Estados Unidos nangruna iti pito a battle ground states, ti Nevada, Michigan, Iowa, North Carolina, Pennsylvania, Arizona ken Georgia kabayatan ti maudi nga aldaw ti panagkampaniya.
Segun ken ni Bombo International News Correspondent Rene Ballenas manipud idiay New Jersey, United States of America, nagduduma dagiti wagas da dati a US President Donald Trump ken Vice President Kamala Harris tapno maallukoy dagiti residente.
Basar iti maudi a Battleground Tracker arigna dikit wenno maibilang a risiris ti laban dagiti dua nga isu ti mangituntunda ti nabara a tension iti Amerika.
Malaksid iti daytoy, gutgutigoten met ni Republican vice presidential nominee JD Vance dagiti botante dagiti residente ti Wisconsin nga ibutos da ni Trump gapu ta patien na a dakkel ti maipaay na iti Estados Unidos.
Adda met ita idiay Wisconsin ni Minnesota Gov. Tim Walz ken agtultuloy ti panangikampaniya na ken ni Harris, gapu ta patien na met a ni Harris tio tulbek ti panagrang-ay ti Estados Unidos.
Maipalagip nga addan ti dandani kagudua ti 150 a milyon nga americans ti nakabotosen.
