LAOAG CITY – Dumanonen iti P250 iti kada kilo ti retail price ti nalabbaga a sibuyas kadagiti sumagmamano a merkado idiay Metro Manila basar iti monitoring ti Department of Agriculture.
Basar iti Department of Agriculture, sumagmamano nga outlet ti aglaklako ti P120 iti kada kilo ngem dagiti dadduma ket dumanon iti P250 depende iti kalidad.
Nababbaba met ti presio dagiti puraw a sibuyas nga agay-ayam manipud iti P120 agingga iti P140 iti kada kilo.
Basar iti ahensia, posible a sumangpeten inton sumaruno a lawas dagiti inangkat nga imported onions idinto a nangrugin a rimmuar dagiti baro nga apit ti sibuyas manipud kadagiti dadakkel nga onion farm ditoy pagilian.
Gapu iti daytoy, manamnama a naan-anay a bumaba ti presio dagiti sibuyas kadagiti sumaruno nga aldaw idinto nga agtultuloy ti panagngato ti volume ti suplay manipud iti local production ken importation.
Naammoan a ditoy Pilipinas, ti monthly consumption ket dumanon iti 17 a ribu a metriko tonelada.
