LAOAG CITY – Nagballaag ti Department of Agriculture a possible nga umabot iti P500 ti kada kilo ti presyo ti karne ti baboy gapu iti agtultuloy a panagngato ti presyo dagiti produkto a petrolyo nga epekto ti tensyon iti Middle East.
Basar iti ahensya, mabalin a ngumato ti nasurok nga 60% ti presyo ti baboy, idinto a possible a ngumato met ti nasurok a 50% ti presyo ti bagas no ad-adda a kumaro ti sitwasyon.
Gapu iti daytoy, adda dagiti sumagmamano a consumers a nagkissay ti gatgatangen da a karne ti baboy idinto a dagiti dadduma ket umak-akar iti nalaklaka nga alternatibo kas ti ikan ken nateng.
Kabayatanna, adda ti sumagmamano nga aglaklako nga agpanpanunot nga isardeng da paylaeng ti aglako ti karne ti baboy gapu iti panagamak da a naan-anay a malugi dagitoy no agtultuloy ti panagngato ti presyo.
