LAOAG CITY – Ballaigi a naisayangkat ti umuna a proyekto ni Police Colonel Frederick Obar kas Acting Provincial Director ti Ilocos Norte Police Provincial Office a Project J.O.I.N wenno Junior Officers of Ilocos Norte.
Segun ken ni Police Colonel Obar, naiyuswat ti March for Life ken pannakairubuat ti nasao a proyekto a nakipartisiparan dagiti kameng ti Philippine National Police, Bureau of Fire Protection, Armed Forces of the Philippines, Philippine Coast Guard, Bureau of Jail Management and Penology Ilocos Norte Provincial Jail, Marines ken pakairamanan dagiti Criminology students ditoy probinsia.
Inbatadna a kalikagumna a mapagtalinaed ti linak, urnos ken talna tapno masaluadan dagiti dakes a mapaspasamak iti intero a probinsia.
Kunana a masirsirmatana ti panagkikinnamayetda babaen ti panangtagiben iti aglawlaw nangruna ket adda dagiti naipadpadamag nga uram iti kallabes.
Innayonna a mangnamnama daytoy ti panagkaykaysa ti amin tapno magun-od ti arapaapda a mapasayaat ken mapapintas pay ti probinsia kabayatan ti panangidaulona.
