LAOAG CITY – Agtultuloy ti imbestigasion ti Philippine National Police iti ili ti Marcos maipapan iti napasamak a pammaltog iti Brgy. Tabucbuc iti nasao nga ili.
Segun ken ni Police Captain Jhonveil Maramag, ti Hepe iti nadakamat nga ili, nabigbig ti biktima a ni Froilan Ramos, mannalon ken residente iti nasao a barangay idinto a nabigbig met ti suspek nga agtawen ti 44 ken residente ti Brgy. Espiritu iti ili ti Dingras.
Inbatadna a basar iti insayangkatda nga imbestigasion, naalada ti tallo a kapsula ti calibre 45 ken maysa a pedaso ti 9mm pistol ken ti balbalana a kukua ti biktima.
Kunana a manarimaan pay laeng nga agpapaimbag ti biktima iti Mariano Marcos Memorial Hospital and Medical Center iti siudad ti Batac no sadio maiyu-uray pay laeng ti medical examination daytoy no ania a paset ti bagina ti nagsagaba ti sugat.
Inlawlawagna a saan met pay a narekobre ti nausar a paltog iti nasao nga insidente ngem naigetda daytoy a birbiruken.
Mainaig iti daytoy, kuna ni Police Captain Maramag nga adda iti pagbaludan ti suspek a natiliw babaen iti manhunt operation no sadino napilaan ti kaso a Frustrated Murder.
Kabayatanna, inpakaammo ni Police Colonel Frederick Obar, ti Provincial Director iti Ilocos Norte Police Provincial Office nga adda ti dati a susik iti nagbaetan ti biktima ken suspek ngem im-imbestigarenda pay laeng ti pudno a makaigapu iti napasamak a pammaltog.
