LAOAG CITY – Inlawlawag ti Provincial Veterinarian a ni Doctor Loida Valenzuela dagiti rumbeng nga aramiden tapno masigurado a saan a makastrek ti African Swine Fever (ASF) virus ditoy Ilocos Norte.
Daytoy ket kalpasan a nakumpirmaran nga adda ti naapektaran a maysa nga ili iti kabangibang a probinsya iti African Swine Fever no sadinno a ti buryas a maipagarop a nakaptan ti virus ket naibiyahe manipud iti sabali a probinsya.
Segun ken ni Valenzuela, saan a makastrek ti African Swine Fever ditoy probinsya no makitinnulong amin dagiti adda iti beddeng ti hog industry kas dagiti hog raisers, hog traders, feed industry (distributor, truckers, feed stores, etc.), meat vendors, butchers, meat processors, meat traders, ken dadduma pay.
Kuna ni Valenzuela a karaman kadagiti rumbeng nga aramiden ket saan paylaeng nga agpaspastrek iti baboy, karne ti baboy, naproseso a karne ti baboy, semilya ti baboy manipud iti lugar nga addaan African Swine Fever.
Inpetteng na a ti laeng maipalubos a makastrek ditoy probinsya ket dagiti breeders nga aggapu iti accredited breeder farms ken addan iti Certificate of Free Status on African Swine Fever ken buryas para iti sentinel pig program ti gobyerno.
Kuna na a liklikan ti panagusar iti bula a pangpadakep kadagiti breeder ken agusar iti semilya nga aggapu iti addaan ti Certificate of Free Status on African Swine Fever farm.
Inpakaammo pay ti Provincial Veterinarian a ti African Swine Fever virus ket paborito na iti danum isut gapuna a saan nga agusar ti danum nga aggapu kadagiti irrigasyon, waig, ken karayan para kadagiti taraken a baboy.
Innayon na nga ipraktis ti biosecurity, baliwan dagiti kannawidan nga ugali iti panagtaraken ken ireport a dagus
iti anyaman a mapasamak iti taraken tapno malapdan ti panagwaras ti nasao a sakit.
Immapela ni Valenzuela a saan koma nga agbalin a nabengngeg tapno saan a maapektaran ti African Swine Fever dagiti taraken a baboy ditoy probinsya.
