LAOAG CITY – Inlawlawag ni Mrs. Rhodalyn Catcho, ti Vice President ti Parents-Teacher Association iti Bingao Elementary School iti ili ti San Nicolas ti naidanun a reklamo ditoy Bombo Radyo.
Daytoy ket mainaig ti maipagarop a panang-pakontribusyon dagiti mangisursuro ti 200 a pisos iti kada estudyante manipod iti kinder aginggana iti Grade 6.
Rumrumuar a ti singsingiren da a kontribusyon ket para iti panangselebrar ti Teachers’ Day intono bigat, Oktubre 2.
Iti eksklusibo nga interview ti Bombo Radyo Laoag ken ni Catcho, inbatad na a dagiti laeng officers ti Supreme Pupil Government Organization (SPGO) ken dagiti presidente iti kada classroom ti agbayad.
Kuna ni Catcho a possible a ti nangipadanun ti isyu ditoy Bombo Radyo ket saanna a naawatan.
Inpasingked na a nagtutulagan da amin a nagannak ti makolektar a kontribusyon tapno igatang da ti regalo kas panangbigbig da ti kinaanus ken panagyaman da metten kadagiti mangisursuro iti pannaka-selebrar ti Teachers’ day.
Malaksid ti regalo, nairaman payen iti nasao a kantidad ti igatang da ti pagsasangwan da.
Kabayatanna, inbatad ni Doctor Jhoan Corpuz, ti DepEd Supt. ditoy Ilocos Norte a no inisyatibo dagiti estudyante ti pannakaipaay ti regalo kas panangbigbig da kadagiti mangisursuro ket awan ti problema.
Nupay kasta, kuna na a saan a kasapulan a nabalor ti mairegalo ken masapol a simple laeng ti mapagsasangwan.
