LAOAG CITY – Nagballaag ti Philippine Institute of Volcanology and Seismology (PHIVOLCS) a posible a ngumato pay ti aktibidad ti Kanlaon Volcano iti uneg ti sumagmamano nga aldaw kagiddan ti agtultuloy a panagpakita ti crater glow wenno “banaag” iti ngiwat daytoy.
Basar iti advisory ti Philippine Institute of Volcanology and Seismology, ti crater glow ket gubuay iti superheated volcanic gas ken mabalin a senyales nga asidegen iti ngiwat ti magma a posible a mangitunda ti nangatngato a tukad ti volcanic unrest.
Nairekord idi rabii ti Mayo 10 ti umuna a gundaway ti incandescence wenno raniag manipud iti ngiwat ti bulkan basar iti Kanlaon Volcano Observatory.
Gapu iti daytoy, posible ti Alert Level 3 iti bulkan nga iti agdama ket adda iti Alert Level 2 a mangipasimudaag nga adda iti moderate volcanic unrest.
Nagballaag pay ti Philippine Institute of Volcanology and Seismology a no bilang maaddaan ti panagputok, mabalin a mangitunda daytoy ti pyroclastic density currents, ashfall, lava flows ken dadduma pay a narisgo a volcanic hazards.
Naiget a maipawil ti panagserrek iti 4-kilometer Permanent Danger Zone kabayatan a mabalbalakadan dagiti lokal a gobierno nga agbalin a naridam iti posible nga evacuation.
