LAOAG CITY – Inpasigurado ti Land Transportation Franchising and Regulatory Board (LTFRB) a suportado latta ni Pres. Ferdinand “Bongbong” Marcos Jr. ti Public Utility Vehicle Modernization Program (PUVMP) nga ilunglungalong ti gobierno.
Daytoy ket iti baet ti resolusion nga inpasa ti Senado a mangirekrekomendar iti temporario a pannakasuspinde iti nasao a programa.
Segun ken ni Land Transportation Franchising and Regulatory Board Chairperson Teofilo Guadiz III, agtultuloy ti implementasion ti programa agingga a naan-anay daytoy a dumanon iti maudi a paset ti modernisasion.
Maipalagip a kadagupan kadagiti 23 a Senador, 22 ditoy ti nagpirma iti Senate Resolution No. 1096 a manggutgutigot iti gobierno a temporario a masuspende ti pannakaipatungpal ti Public Utility Vehicle Modernization Program a mas am-ammo iti awag itan a Public Transport Modernization Program (PTMP).
Immuna iti daytoy, nangisayangkat ti unity walk dagiti sumagmamano a transport cooperatives a kimmontra iti Public Utility Vehicle Modernization Program a ti gagemda ket lappedan ti nasao a resolusion ti Senado.
