LAOAG CITY – Kwinestionaran ni Davao City Rep. Paolo “Pulong” Duterte ti pannakasapol ti testimoniana iti imbestigasion ti National Bureau of Investigation (NBI) mainaig iti alegasion ti dati a pulis a ni Rodulfo Gracioso Jr. iti maipagarup a pannakaipatulod dagiti minaleta a kuarta kenkuana ken iti pamiliana.
Iti maysa a rakurak, inbatad ni Duterte a no patien dagiti imbestigador dagiti rakurak ni Gracioso a nakabasar iti resulta ti polygraph wenno lie detector test, masapol nga addaandan ti naan-anay nga ebidensia ken saanen a masapol pay ti testimoniana.
Kwinestionaran pay ti Kongresista no saan pay a kumpleto ti iggem nga ebidensia dagiti otoridad wenno adda ti panagdudua ti National Bureau of Investigation (NBI) iti kredibilidad ni Gracioso.
Maipalagip nga idi laeng Sabado ket nangipatulod ti National Bureau of Investigation (NBI) ti imbitasion ken ni Duterte tapno sumango iti ahensia inton bigat, Oktubre 12 tapno lawlawgenna dagiti alegasion ni Gracioso kontra kenkuana ken iti pamiliana.
Basar iti testimonia ti dati a pulis, agarup dua a billion a pisos ti impatulodna ken ni Vice President Sara Duterte, P1 billion ken ni dati a Presidente Rodrigo Duterte ken P100 milion met ken ni Paolo Duterte.
Segun kenkuana, in-inot a naipatulod dagiti minaleta a kuarta sipud idi tawen 2018, babaen iti pammilin ni dati a House Speaker Lord Allan Velasco.
