LAOAG CITY – Inaprobaran ti Sangguniang Panlungsod ditoy siudad ti Laoag ti maysa a resolusion a mangkiddaw ti pundo para iti pannakaestablisar ti mini park ken walkable space iti bisinidad ti Laoag Central Elementary School.
Daytoy ket kalpasan nga adda ti 11 nga agpanpanday linteg ti pimmabor, maysa ti nag-abstain ken awan ti kimmontra.
Segun ken ni Konsehal Jason Perrera, ti kakaisuna a nag-abstain a kasapulan a maipakada nga umuna iti Diocese of Laoag ti nasao a proyekto gapu ta daytoy ket rumrummuar a kukua ti simbaan daytoy a paset ditoy siudad.
Mainaig iti daytoy, inlawlawag ni Atty. Charito Malicad, mangidadaulo ti City Tourism Office a basar iti City Assessor’s Office ket nakailanad a kukua ti lokal a gobierno iti nasao a daga.
Kabayatanna, inpanamnama ni Konsehal Bjorn Lao a maisaruno ti pannakikoordinar iti simbaan katolika sakbay a marugian ti proyekto gapu ta ti resolusion a naipasa ket gakat nga agkiddaw pay laeng ti pundo ken sabalinto manen ti gakat a maidasar apaman a mangrugi ti pannakaestablisar ti mini park.
Maipalagip nga immannugot ti City Engineering Office, Legal Counsel ken ti mangidadaulo ti Laoag Central Elementary School iti pannakaestablisar ti nasao a proyekto iti naisayangkat a public consultation.
