LAOAG CITY – Nagyaman ti Polytechnic University of the Philippines-Open University System (PUP-OUS), State Colleges and Universities ken Department of Energy (DOE) ti suporta ken tulong ti gobierno siudad ken dagiti Laoagueños iti balligi a panangiwayat da ti panagadal wenno survey iti panagusar ti enerhiya kangrunaannan ti kuryente.
Kuna ni Mayor James Bryan Alcid a daytoy ket paset ti Comprehensive Regional Energy Study in the Philippines – Assessing the National IEC Campaign on the Consumer Connect Program of the Department of Energy.
Inbatad ti Mayor a dakkel a banag daytoy para iti maimplementar a programa gapu ta pagibasaran da ti resulta iti survey.
Mainaig iti daytoy, kunana nga agtultuloy latta dagiti inisiatibo ken programa para iti pakalag-anan dagiti konsyumer.
Innayonna a mangiyimplementarda dagiti wagas para iti nasay-sayaat a panagusar ti enerhiya.
Kabayatanna, inbatadna a dagiti pannakainstolar dagiti naruay a solar lights ken pannakagatang dagiti electic bikes ket paset amin ti kalikagumna nga agbalin nga Smart City ditoy siudad ti Laoag.
