LAOAG CITY – Umad-adu dagiti Pilipino nga agus-usar ti rooftop solar panels tapno makissayan ti nangato a singir iti kuryente.
Basar iti report, ti Pilipinas ti kadakkelan ti nagastos iti solar panels iti intero a lubong sipud nangrugi ti gubat iti Middle East iti maudi a paset ti Pebrero.
Ngimmato ti 10% ti singir iti kuryente ti Meralco isu nga umab-aboten ti sumurok-kumurang 12% ti binulan a birok ti maysa a gagangay a pamilia ti gastos iti kuryente.
Maysa met ti Pilipinas iti addaan ti kangatoan a residential electricity rates iti Southeast Asia.
Iti uneg ti tallo a bulan nga agingga idi Mayo, umabot iti $407 milyon ti inangkat a solar panels ti pagilian manipud idiay China wenno 145% a nangatngato maidasig iti napalabas a tawen.
