LAOAG CITY – Napaigetan dagiti quarantine checkpoints ti probinsia kangrunaanna iti ili ti Badoc ken Pagudpud.
Inbatad ni Provincial Veterinarian Dr. Loida Valenzuela daytoy ket kalpasan nga adda ti nagpositibo ti African Swine Fever wenno ASF virus iti maysa nga ili iti kabangibang a probinsia.
Malaksid iti daytoy, kunana a napatigmaanan payen dagiti nagduduma a Local Government Units ditoy probinsia a masapul nga agridam kadagiti maiserserrek a baboy wenno karne ti baboy kadagiti bukod dagitoy a lugar.
Segun ken ni Dr. Valenzuela, no adda ti baboy a mailaklako nga aggapo iti sabali a lugar ket masapul nga adda ti maipakita dagiti maseknan a barangay certificate a mangpasingked a nasalun-at ti baboy ken awan ti kaso ti African Swine Fever ti “piggery” a naggapoan ti baboy.
Inbatadna a nabalakadan payen dagiti municipal agriculturist ken dagiti veterinarian a mangipaay ti “certificate” a mangpasingked a nasalun-at ti mairuar a taraken a mailako iti sabali a lugar tapno makita ti lugar a naggapoan dagiti baboy.
Kabayatanna, inpakaammona nga agtultuloy ti panagalada ti dara ti baboy tapno maeksamen ket madeterminar no natalged met laeng dagiti baboy ditoy probinsia.
Innayonna a dagiti laeng mapalubusan a maiserrek a processed meat products ditoy probinsia ket dagiti laeng naggapo kadagiti accredited iti gobierno probinsial ken dimmalan iti evaluation ti provincial compliance team wenno monitoring team a bukbuklen ti Provincial Health Office, Environment, Metro Ilocos Norte Council ken ti Provincial Veterinary Office.
