LAOAG CITY – Natungpal ti kararag ni Ms. Kyla Camille Ortal, Rank 2 iti April 2026 Pharmacist Licensure Examination iti Dios nga agbalin a topnotcher iti board examination.
Segun kenkuana, inkararagna iti Dios a no saan man nga agbalin a Rank 1 iti board examination ket agbalin daytoy a Rank 2 wenno Rank 3 agingga Rank 10 basta makastrek isuna kadagiti topnotchers.
Inbatadna a ti gagemna ket agbalin a topnotcher isu a nagbalin a naiget ti panagkararagna iti Dios tapno tarabayan isuna a magun-od ti arapaapna banag a tinungpal met ti Dios.
Inlawlawagna a kanayonna nga ibagbaga iti bagina a “kabaelak daytoy, apay koma a saanko a kabaelan,” nga isu ti mangpatpatibker iti pakinakemna ken tapno saan a mapukawan ti namnama.
Inadmitirna a narigat ti dua nga aldaw nga eksaminasion ngem nagtalek daytoy iti Dios a saanna isuna a binaybay-an.
Kunana nga idi ubing daytoy ket kalikagumna nga agbalin a mangisursuro wenno astronaut ngem kabayatan a dumakdakkel isuna ket pharmacist metten ti sinurot ti pusona.
Inbalakadna kadagiti mangala ti eksaminasion nga ipaay aminen ti “best” wenno kabaelan iti umuna a gundaway tapno saan nga agbabawi iti kamaudiananna.
Kabayatanna, ni Ms. Ortal ket nakagun-od ti 94.35% rating ken maysa kadagiti innem a topnotchers manipud iti Mariano Marcos State University iti kaliplippas nga April 2026 Pharmacist Licensure Examination.
