LAOAG CITY – Natay ti maysa a lider ti New People’s Army (NPA) ken 18 a miembrona kalpasan a nakirinnupak iti tropa ti gobierno iti Barangay Salamanca, Toboso idiay Negros Occidental idi Domingo.
Binigbig ti Philippine Army ti napapatay a lider a ni Roger Fabillar nga agus-usar dagiti alyas nga “Arnel Tapang,” “Jhong,” “Nono” ken “Domeng.”
Maysa a suldado met ti apagapaman a nasugatan iti rinnupak a nangrugi agarup alas-4:00 ti parbangon.
Basar iti militar, adda ti nailatang a P1 milyon a gunguna para iti panangarestar wenno panangpapatay ken ni Fabillar gapu iti maipagarup a pannakairaman iti panangpapatay kadagiti sibilian iti Calatrava ken Toboso.
Inbatad ni Brig. Gen. Ted Dumosmog, commander ti 303rd Infantry Brigade, narekobre dagiti bangkay dagiti natay iti Sitio Plariding, sumagmamano a kilometro manipud iti nakapasamakan ti umuna a rinnupak iti Sitio Sinugmawan.
Mapatta-patta nga adda ti sumurok 10 a rebelde ti natay nupay agtultuloy ti retrieval ken documentation dagiti otoridad iti lugar.
Mapapati a karaman ti grupo iti nabatbati a puersa ti Northern Negros Front nga agtultuloy ti operasion iti probinsia.
Gapu iti rinnupak, nagibakwit ti 653 a residente iti Toboso para iti seguridad dagitoy.
