LAOAG CITY – Nangipaay ti mensahe ni Davao City 1st District Representative Paolo Duterte iti ama na a ni dati a Presidente Rodrigo Duterte iti “Father’s Day” a naselebraran ita nga aldaw, Hunyo 21.
Iti mensahe ti kongresista, nagyaman iti ama na gapu iti kinatikber ken determinasyon na, kagiddan ti panangibaga na nga aniaman dagiti karit a sangsangwen ti dati a presidente iti agdama ket maysa a banag laeng ti saan nga agbaliw, ti panagyaman ken panangipateg da kenkuana adigi ti pamilya da.
Inbatad ni Congressman Duterte a nakita da no kasanu ti kinatibker ken kina-determinado ti dati a presidente iti panangprotehir na iti pamilya da ken kadagiti tattao a nagserbian na.
Innayon na a kas ti ado nga amma, ammo na nga ado dagiti sakripisyo a ti laeng dati a presidente ti makaammo ken no kasanu ti kadagsen da.
Maipalagip a ti dati a presidente ket agdama a nakabalud iti The Hague iti babaen ti kustodyar ti International Criminal Court para iti kaso na a crimes against humanity , nga adda ti pakainaigan ti kampanya na kontra illegal a droga iti daytoy ti mayor iti Davao City ken nagbalin a presidente ti Pilipinas.
Malaksid iti mensahe ti kongresista iti ama na, ket kinablaawan na pay dagiti opisyal ti gobierno nga indiskribir na kas “bangag” ken “korap” iti lengwahe a Bisaya.
Kuna na nga itultuloy da laeng ti panagragsak da ken iramraman da pay dagiti annak da iti ar-aramiden da a kalokoan, kagiddan ti panangibaga na a dandani metten ti oras wenno panawen da.
