LAOAG CITY – Kinumpirmaran ni Atty. Diosdado Araos, mangidadaulo iti National Bureau of Investigation (NBI) ditoy ciudad ti Laoag nga isagsagana dan ti kaso a human traffficking kontra iti maysa a babai.
Ti suspek ket agtawen ti 20 ken residente iti ili ti San Nicolas ngem tubo iti probinsya ti Isabela.
Segun kenni Araos, ti suspek ket natiliw babaen iti panagpammarang ti kameng ti NBI a customer iti maysa a babai.
Kalpasan ti pannakatiliw ti suspek ket balligi met a narescue da ti biktima wenno ti inbugaw ti suspek nga agtawen ti 22 ken residente met laeng iti nasao nga ili.
Kuna ni Araos a ti entrapment operation ket naiyuswat iti maysa nga hotel iti Barangay 51-A Nangalisan ditoy ciudad ti Laoag.
Iti agdama, ti biktima ket naipasidong iti City Social Welfare and Development Office ditoy ciudad idinto a ti suspek ket adda iti kustudiyar ti NBI ken intono Lunes ket maipila ti kaso.
