LAOAG CITY – Napirmaanen ni Vice Governor Cecilia Araneta-Marcos ti maysa a resolusyon para iti pannakaipataw ti 60 nga aldaw a preventive suspension kontra ken ni Mayor Joseph de Lara iti ili ti Solsona.
Nupay kasta, kuna ti bise gobernador a saanna a masigurado no naiserbin ti preventive suspension kontra ken ni de Lara gapu ta naka-work from home daytoy.
Inlawlawag ni Marcos a ti pannakaipataw ti 60 nga aldaw a preventive suspension ken ni de Lara ket desisyon ti mayorya iti Sang Panlalawigan.
Maipalagip a napilaan ti kaso administratibo ni Mayor de Lara babaen kadagiti sumagmamano a sang bayan members iti ili ti Solsona.
Daytoy ket kalpasan a saan a pinalubusan ti mayor dagiti department heads manipod iti executive department a mapan agatendar iti sesyon ti konseho tapno mapagsaludsudan dagitoy mainaig kadagiti proyekto a nakaipanan ti covid-19 fund.
Immunan nga inbaga ti bise gobernador a saan a pabor iti pannakaipataw ti preventive suspension kadagiti mayor ditoy probinsya gapu ta kasapulan isuda dagiti constituents da nangruna ita a panawen ti pandemya gubuay ti COVID-19.
