LAOAG CITY – Inlawlawag ni Philippine Coast Guard (PCG) spokesperson ti West Philippine Sea Commodore Jay Tarriela a masapul nga umuna nga aprobaran ni Presidente Ferdinand Marcos Jr. ti rekomendasion ti National Maritime Council a mangipakaammo iti publiko ti pannakaisayangkat dagiti regular rotation ken resupply missions iti military outpost ti pagilian a BRP Sierra Madre iti Ayungin shoal.
Maipalagip nga inrekomendar ti konseho nga idadauluan ni Executive Secretary Lucas Bersamin ti miting a naisyangkat iti Malacañang Palace.
Segun ken ni Bersamin, awan ti makitana a dakes iti pannakaipakaammo ti RoRe missions nga agtalinaed a routinary ken regular.
Naangay ti miting kalpasan nga imbilin ni Presidente Marcos kadagiti maseknan a sekretario ti Gabinete a pagsaritaanda ti sabali pay nga insidente iti Ayungin shoal a nakasugatan ti 7 a kameng ti Philippine Navy, pakairamanan ti maysa a nasugatan ken naputolan ti ramay.
Iti press conference idi laeng kalman, inbatad ni Comm. Tarriela nga agtultuloy ti panagtitinnulong ti Armed Forces of the Philippines ken Philippine Coast Guard iti panangisayangkat ti resupply missions iti masakbayan.
Kabayatanna, agtultuloy a maibilang ti resupply operation kas ordinario, lehitimo ken routine operation ti Armed Forces of the Philippines.
