LAOAG CITY – Nangipatulod ti surat ni Sen. Imee Marcos iti kabsatna a ni Presidente Ferdinand “Bongbong” Marcos Jr. tapno kiddawen ti temporario a pannaka-relieve iti puesto ti sumagmamano nga opisial ti National Bureau of Investigation (NBI) kalpasan ti riribok iti Senado.
Karaman kadagiti innaganan ti senadora da NBI Director Atty. Melvin Matibag, NBI-NCR Chief Atty. Emeterio Dongallo Jr. ken NBI-Organized and Transnational Crime Division Chief Atty. Jerome Bomediano.
Ti kiddaw ket mainaig iti imbestigasion iti Senate standoff a napasamak idi rabii no sadinno a mamati ti agpanpanday linteg a nasaysayaat a temporario nga ikkaten pay laeng iti puesto dagiti nadakamat nga opisial kabayatan nga agtultuloy ti imbestigasion.
Gagem daytoy nga addang tapno masigurado ti panagbalin a patas ken naurnos ti imbestigasion ken maliklikan ti aniaman a posible nga impluwensia manipud kadagiti opisial a direkta a karaman iti insidente.
