LAOAG CITY – Opisial a nagpirma ti Department of Justice, Bureau of Customs ken National Bureau of Investigation iti maysa a Tripartite Memorandum of Agreement (MOA).
Personal a nagturong iti Department of Justice ken nagpirma iti nadakamat a katulgan dagiti mangidadaulo ti ahensia a da Justice Secretary Fredderick Vida, National Bureau of Investigation (NBI) Director Atty. Melvin Matibag ken Customs Commissioner Ariel Nepomuceno.
Gagem ti katulagan a patibkeren dagiti ahensia ti relasionda tapno kontraen ti ‘agricultural smuggling’ iti pagilian.
Segun ken ni Justice Sec. Vida, mangbukelda ti ‘joint task force’ para iti koordinasion, imbestigasion ken prosekusion.
Nagpakdaar ti sekretario a siguradoenda nga imbestigaranda dagiti ‘smugglers’ ken dagiti maseknan nga empleado ti gobierno iti illegal nga aramid.
Kabayatanna, tinestigoan ni Ombudsman Jesus Crispin ‘Boying Remulla ti nadakamat a panagpirma ti katulagan.
Inpaganetget ti Ombudsman nga awan santoenda a pagsungbaten, aniaman a posision, ranggo, koneksion ken impluwensia.
