LAOAG CITY – Inyistoria ni Israeli Prime Minister Benjamin Netanyahu a nalimed daytoy a bimmisita iti United Arab Emirates ken nakitaripnong ken ni United Arab Emirates President Sheikh Mohammed bin Zayed iti baet ti gubat iti Iran ken inawaganna daytoy nga “historic breakthrough” para iti nagbaetan ti dua a pagilian.
Nupay kasta, naiget a naglikudan ti United Arab Emirates Foreign Ministry ti nasao a rakurak ken kunana nga awan ti kinapudnona dagiti damag mainaig iti panagbisita.
Inlawlawag ti Abu Dhabi a ti relasion daytoy iti Israel ket maiyataday iti Abraham Accords ken maiwaywayat iti pormal ken opisial a wagas a saan ketdi iti aniaman a saan nga otorisado a katulagan.
Iti baet daytoy, nagtalinaed a nabara ti rehion kalpasan dagiti damag iti panangatake ti Iran iti sumagmamano a target iti United Arab Emirates kabayatan nga agtultuloy ti gubat iti Middle East.
