LOAG CITY – Naibakwit dagiti rinibo a residente iti Garden Cove, California kalpasan ti ballaag ti maysa a perdi a chemical tank a posible a sumabog ket mangited ti nakaro nga asok.
Segun iti Orange County Fire Authority, ti tangke ket addaan karga a methyl methacrylate, maysa nga alisto nga umapoy a kemikal a mau-usar iti panagaramid ti platik ken aerospace manufacturing.
Inbatad ni division chief Craig Covey nga agtultuloy ti panagsibogda iti danum kadagiti tangke babaen ti mechanical device tapno bumaba ti temperatura ken malappedan ti panagsabog.
Tallo a evacuation shelters ti naipasdek idiay Garden Grove, Anaheim, ken Cypress.
Mapattapatta nga 40,000 nga umili ti adda iti evacuation zone, ngem segun kadagiti otoridad, agarup 15% pay laeng ti agkedked nga agibakwit.
Nagballaag pay dagiti health officials a ti makasabidong a toxic vapor ket mabalin a mangpataud iti nakaro a problema iti panaganges no adda napaut nga exposure.
Nupay kasta, kinuna ni Dr. Regina Chinsio-Kwong iti Orange County Health Care Agency nga awan ti naduktalan a makasabidong a toxic vapor iti panang-monitorda iti air quality.
