LAOAG CITY – Inakusaran ni Russian President Vladimir Putin dagiti mangidadaulo ti Wagner mutiny a kayat da a makita ti Russia a nabekkel ti nadara a rinnupak.
Iti ababa a panagbitla ni Putin, inkari na nga ipaayan na dagiti nangorganisar iti panagalsa iti hustisya.
Nupay kasta, inawagan na dagiti regular a kameng ti Wagner a “patriots” a mapalubusan a makikappeng iti tropa da, agturong man iti Belarus wenno agawid iti bukod da a pagtaengan.
Saan a direkta nga innaganan ni Putin ti boss ti Wagner a ni Yevgeny Prigozhin, nga immunan a naglibakan na a ginandat da a pabagsaken ti rehimen ni Putin.
Ni Wagner ket maysa a private army dagiti mersenaryo a makilablaban kadwa na ti regular a tropa ti Russia iti Ukraine.
Ti ababa a panawen a panagrebelde dagiti mannakigubat a Wagner ket maysa a sungbat kadagiti plano ti gobierno a mangala iti direkta a panangtengngel iti grupo.
Immuna iti daytoy, inlawlawag ti Russian mercenary leader a ti inaramid da a maysa nga aldaw a rebellion ket saan da a gagem a pabagsaken ti gobyerno.
Inpetteng ti Wagner group leader a kayat da laeng ti agprotesta iti saan a panagbalin nga epektibo ti inaramid a panangraot ti Russia iti Ukraine.
Agtultuloy nga ipanpannakkel ni Prighozin a ti Wagner ket isu ti epektibo a puwersa ti Russia ken uray iti intero a lubong.
Innayon na a kas pammaneknek ket ti panagbalin a nakapuy dagiti soldado ti Russia idi nakubkob da ti Rostov-on-Don City nga awan ti naiparukpok a dara ken daytoy ket addaa ti kaadayo a 200 a kilometro manipod iti Moscow.
Inakusaran pay ni Prighozin ti Russian military nga isuda ti akin-aramid iti panagatake iti kampo da usar dagiti missiles ken helicopters a nagresulta iti pannakatay ti nasurok a 30 a miembro da.
