LAOAG CITY – Maibilang nga ‘hoarding’ ti saan a panangiruar kadagiti kargamento nga ip-ipiten dagiti consignees kangrunaanna kadagiti imported a bagas nga adda idiay Port of Manila.
Daytoy ti inrakurak ni Philippine Ports Authority (PPA) General Manager Jay Santiago kageddan ti report ti port congestion iti Manila International Container Terminal (MICT).
Iti singasing ti Philippine Ports Authority, nasken a kumpiskarenen ti Bureau of Customs (BOC) dagiti imported a bagas a nasurok 30 nga adawen nga adda iti pantalan.
Inbatad ni Santiago, maikanniwas daytoy iti Customs Modernization Act a mangibagbaga ti mabalin nga ideklara nga abandonado ti maysa a kargamento a limmabes ti maysa a bulan iti pantalan nupay nabayadanen ti buis.
Naammoan a mangrugi inton Oktubre 1 ket iruardan ti nagan dagiti consignee iti daytoy ken ilungalong iti Bureau of Customs a rugianen ti panangideklara kadagiti kargamentoda a bagas kas abandonado.
