LAOAG CITY – Inbatad ni Doctor Alan Taylan a saan a rumbeng a maikkat wenno boluntaryo laengen ti panagusar ti face mask ditoy pagilyan.
Inpalgak na a saan pay a naan-anay a napukaw ti covid-19 virus isut gapuna a rumbeng nga agusar latta ti face mask sadinno man ti pagturungan kangrunaan na dagiti nakulob a lugar.
Kuna na a para kenkuana ket nasaysayaat no saan paylaeng a maikkat ti panagusar ti face mask tapno nataltalged ti publiko.
Innayon na a saan laeng a ti covid-19 virus ti mabalin a maprebentaran no agusar ti face mask no di ket dagiti pay nagduduma a sakit kas iti pneumonia, tuberculosis ken dadduma pay.
Reaksyon daytoy ni Doctor Taylan kalpasan nga inrekomendar ti Inter-Agency Task Force of Emerging Infectious Diseases (IATF) a boluntaryo ti panagusar ti face mask iti ruwar.
Inpakaammo ni Doctor Taylan nga uray maaprubaran daytoy a kayat ti Inter-Agency Task Force of Emerging Infectious Diseases (IATF) ket ipatungpal da latta iti ospital da ti mandatory a panagusar iti face mask dagiti pasyente ken amin nga agturong iti lugar.
