LAOAG CITY – Nangiruar ti pakdaar ti Toxics watchdog EcoWaste Coalition maipapan iti agtultuloy a panaglako ti imported baby wipes a naglaon ti preservatives nga ipawil ti Food and Drug Administration gapu iti peggad iti salun-at.
Iti maysa a rakurak, nangipakita ti panagamak ti grupo kalpasan a nakagatang ti lima a saan nga otorisado a baby wipes products idiay Calapan City, Mindoro Oriental nga addaan ti methylchloroisothiazolinone (MCI), methylisothiazolinone (MIT) ken isobutylparaben kas ingredients.
Basar iti EcoWaste, ti nasao a kemikal ket ipawil ti Food and Drug Administration iti leave-on cosmetic products sipod idi 2016 agingga 2018.
Inbatad ti grupo a ti MCI ken MIT ket mangitunda ti panaglabbaga ti kudil ken panagbudo idinto ti isobutylparaben ket am-ammo kas maysa a kemikal a makaapektar iti endocrine.
Inlawlawag ti grupo a dagiti wipes a kangrunaan nga addaan ti label a “made in China,” ket addaan ti presio iti nagbaetan ti P25 ken P49.75 iti kada pack ken inaramid laeng iti kallabes a mangipakpakita a dagitoy ket saan a daan nga stock.
Basar iti World Health Organization, ti MCI/MIT ket mabalin a mangitunda ti contact dermatitis, maysa a kondision iti panaglabbaga ti kudil ken panagbudo.
Nagpanawagan pay ti EcoWaste kadagiti manufacturer, importer, distributor ken retailer a siguradoenda a saan a mailako iti publiko dagiti produkto a naglaon kadagiti maipawil a ramen ken inpettengna ti corporate social responsibility.
