LAOAG CITY – Inpasigurado ti Philippine Health Insurance Corporation (PhilHealth) nga adda ti coverage dagiti miembroda para kadagiti sakit gapu iti panawen ti kalgaw.
Inbatad ti PhilHealth a mabalin a mausar ti inpatient benefit packages para iti masansan a sakit tunggal panawen ti kalgaw iti amin a PhilHealth-accredited hospitals iti intero a pagilian tapno makissayan ti gastosen dagiti pasiente.
Karaman kadagiti sakup ti heat stroke, heat exhaustion, heat collapse, heat cramp ken sunstroke nga addaan ti gatad a P12,675; heat fatigue ken dadduma pay nga epekto ti init ken raniag a P18,135; ken moderate agingga severe dehydration a P7,800.
Sakup ti dadduma pay a kondision kas ti tuko nga awanan ti komplikasion (P7,800), typhoid fever (P19,500), sore eyes wenno conjunctivitis (P16,575), infectious diarrhea wenno acute gastroenteritis (P11,700) ken pannakasabidong manipud iti ikan ken dadduma pay nga ayup iti baybay kas ti jellyfish, sea anemone, shellfish ken starfish nga addaan ti gatad a P11,115.
Inpetteng ti PhilHealth a dagiti emergency a kasapulan a medikal pakairamanan dagiti kaso nga adda ti pakainaiganna iti init ket sakup ti Outpatient Emergency Care Benefit (OECB) package nga available kdagiti accredited Level 1 agingga 3 nga ospital.
Basar iti ahensia, makatulong daytoy tapno insigida a makaala ti agas dagiti miembro ken mapapigsa ti proteksion iti pinansialda no adda ti emerhensia.
