LAOAG CITY – Intantan pay laeng ti San Pablo, Laguna Regional Trial Court ti panangiyisyu ti ‘warrant of arrest’ kontra iti negosiante a ni Charlie ‘Atong’ Ang.
Daytoy mismo ti kinumpirmaran ni Justice Spokesperson Atty. Polo Martinez iti inrakurakna mainaig iti nakapenpen pay a naipila a kaso iti korte.
Inbatadna a na-defer ken saan pay laeng a mangiparuk-at ti ‘arrest warrant’ ti nasao a korte maiyataday iti naipila a mosyon iti bangir a kampo.
Nangipila ti ‘motion to suspend proceedings’ ti pugante a ni Atong Ang basar iti nasao a pannakangiwat isut gapuna nga awan pay naiparuk-at a warrant.
Daytoy ket naidumduma maidasig kadagiti dadduma a korte nga immunan a nangiyisyu ti arrest warrant kontra ken ni Ang kadagiti kapada a kaso nga inpila ti prosekusion kontra kenkuana.
Dagitoy a korte ket iti Regional Trial Courts ti Sta. Cruz, Laguna ken Lipa City, Batangas.
Inbatad ni Prosecutor General Richard Anthony Fadullon ti National Prosecution Service a malaksid iti panangitantan ti panangiyisyu ti arrest warrant, nangiparuk-at ti nasao a korte ti pammilin.
Inbilinna daytoy nga isubmitir dagiti ebidensia ken dagiti sumagmamano a ‘counter affidavits’ dagiti respondents kabayatan nga adda pay laeng iti ahensia ti reklamo wenno maiwaywayat ti ‘preliminary investigation.’
Gapu iti daytoy, inlawlawag ti opisial ti proseso ti korte nangruna iti maipapan ti panangiyisyu ti ‘arrest warrant’ kontra iti maysa nga akusado.
Kuna ni Prosecutor Gen. Fadullon, kagiddan ti pormal a panangipila iti korte ti kaso, adda ti sumagmamano nga aldaw daytoy tapno tingitingen ti inpasa nga impormasion.
Iti uneg ti 10 nga aldaw, duktalen ti korte no adda ti umdas a rason ken pangibasaran tapno daytoy ket mangiparuk-at ti arrest warrant.
Ti pugante a ni Charlie ‘Atong’ Ang, iti baet dagiti arrest warrant nga inyisyu ti korte ket manarimaan pay laeng a birbiruken dagiti otoridad.
Sumangsango daytoy iti kaso a kidnapping with homicide ken kidnapping with serious illegal detention mainaig iti pannakapukaw dagiti mammallot.
