LAOAG CITY – In-acquit ti Sandiganbayan ni dati a Philippine National Police chief Alan Purisima ken 16 a dadduma pay nga akusado mainaig iti maipagarup nga irregular a kontrata ti Philippine National Police iti Werfast Documentary Agency, Inc. idi 2011.
Iti desision ti Sixth Division ti korte, inbatadna a napaay a paneknekan ti prosekusion ti basol dagiti akusado, “beyond reasonable doubt.”
Maipalagip a ti dati a Philippine National Police chief ket inakusaran ti panaglabsing iti Anti-Graft and Corrupt Practices Act gapu iti panangpirma ti memorandum ti katulagan iti Werfast para iti computerized firearms license renewal system.
Basar iti prosekusion, saan a dimmalan iti public bidding ti kontrata ken saan a kualipikado ti Werfast kas courier firm, awanan daytoy ti SEC registration ken pammalubos manipud iti Department of Transportation and Communications.
Nupay kasta, kuna ti Sandiganbayan nga awan ti ebidensia ti conspiracy ken awan ti umdas a pammaneknek ti aktual a pannakadadael gubuay kadagiti pannakaitantan iti panag-deliver ti firearms licenses.
Inikkat met ti korte dagiti hold departure orders kontra kadagiti akusado ken inbilinna ti Bureau of Immigration nga ikkatenen dagiti naganda iti watchlist.
