LAOAG CITY – Pinatibker ti Second Division ti Sandiganbayan ti immuna a desisyon na nga ibasura ti mosyon ni Senador Jinggoy Estrada a paawan ti bileg ti kaso a graft kontra kenkuana mainaig iti maipagarop a kickback na kadagiti flood control project.
Inbasura met ti korte dagiti mosyon ni Estrada nga ipasardeng ti panagdengngeg ti kaso.
Iti resolusyon nga insurat ni Presiding Justice Geraldine Econg, awan ti naidatag ni Estrada a baro nga ebidensiya wenno legal a pagibasaran tapno baliktaden ti immuna a nagbalin a desisyon da.
Inpetteng ni Estrada a nakurang ti criminal information gapu ta maipagarop a saan a nalawag ti nagbalin a partisipasyon iti kaso.
Nupay kasta, kuna ti korte a dagitoy nga isyu ket saan a rumbeng a pagsasaritaan iti trial ken saan a pagibasaran tapno ibasura ti kaso.
